May 13, 2024
Tirana, Albania
Kronikë Lajmi i fundit

Punonjësi i bankës zbuloi gjithçka. “Pandora” godet 12 call centera në disa shtete, mes tyre edhe në Shqipëri

EUROPOL njofton se ka goditur një tjetër veprimtari kriminale në fushën e mashtrimit kompjuterik, teksa këtë herë janë shkatërruar 12 call centera gjatë një operacioni të koduar “Pandora”.

Sipas njoftimit nga EUROPOL ky aksion u zhvillua në Gjermani, Shqipëri, Bosnjë e Hercegovinë, Liban dhe Kosovë. Këto qendra u identifikuan si burime të mijëra telefonatave mashtruese në ditë ndërsa punonjësit  përdorën një gamë të gjerë taktikash, duke filluar nga thirrjet e rreme deri te mashtrimet bindëse të investimeve.

“Pandora” thuhet se nisi falë një punonjësi të vëmendshëm në një bankë në Freiburg kur një klient u përpoq të tërhiqte mbi 100 mijë euro në para në dhjetor të vitit të kaluar, e në këtë moment punonjësi mësoi se klienti kishte qenë viktimë e një mashtrimi nga oficerë të rremë policie.

Sipas EUROPOL-it, personi në fjalë ishte zbuluar se kishte realizuar më shumë se 28 mijë telefonata mashtruese gjatë 48 orëve. Policia më pas krijoi qendrën e saj të thirrjeve për t’u marrë me mashtruesit.

Që nga dhjetori 2023, mbi njëqind oficerë u vendosën në Zyrën e Policisë Kriminale të Shtetit Baden-Wurttemberg dhe siguruan përmbajtjen e mbi 1.3 milion bisedave telefonike mashtruese. Në vetëm katër muaj, policia regjistroi më shumë se 7 mijë e 500 thirrje, gjë që bëri që autoritetet të nisnin procedimin penal.

Në përgjithësi, “zyrtarët e qendrës së thirrjeve” kanë arritur të parandalojnë dëme financiare për viktimat në mbi 80 për qind të rasteve, që do të thotë se janë parandaluar dëme në vlerë prej dhjetë milionë eurosh. Ky bashkëpunim ndërkombëtar çoi në arrestimin e 21 të dyshuarve dhe sekuestrimin e parave të gatshme dhe sendeve me vlerë prej një milion eurosh.