May 13, 2024
Tirana, Albania
Politikë

Shkëlzen Berisha: Nuk jam takuar askund dhe asnjëherë, me Erion Veliajn!

Shkëlzen Berisha ka reaguar pas aludimeve të fundit për takim mes tij dhe krybashkiakut të Tiranës, Erion Veliajn.

 

Përmes një postimi në rrjetet sociale, Berisha shkruan se kjo deklaratë është një trillim i vërtetë, pasi, nuk është takuar kurrë me Erion Veliajn. Ai shprehet se e vetmja lidhje me kryebashkiakun është “neveria ndaj shpifjeve të adresuara nga ai ndër vite, ndaj meje, fëmijëve dhe familjarëve të mi.”

REAGIMI I PLOTË:

 

Sot lexova për një trillim të përcjellë në një studio televizive për gjoja një takim timin me Erion Velinë para shumë vitesh. Së pari sado qesharak pretendimi, në respekt të vërtetës dhe të opinionit më duhet të sqaroj se nuk jam takuar KURRË me personin në fjalë ASKUND dhe ASNJËHERË. Me Erjon Velinë me lidh vetëm neveria ndaj shpifjeve të adresuara nga ai ndër vite, ndaj meje, fëmijëve dhe familjarëve të mi.

 

Së dyti pavarësisht neverisë ndaj personit në fjale, dëshiroj që emri im të mos përdoret si instrument në luftën e brendshme të grupeve e klaneve në pushtetin e kalbëzuar të Edi Ramës, që sot e gjithë ditën, helmojnë dynjanë duke spiunuar e shpifur për njëri-tjetrin!

 

Së treti ky sqarim bëhet dhe për ata pseudo opozitarë që mungesën ULËRITËSE të reagimit ndaj vjedhjes se 160 milionë eurove në aferat e inceneratorëve dhe kompanisë 5D, kërkojnë dëshpërimisht ta fshehin e justifikojnë pas çdo trillimi e shpifje për të bërë opozitën e opozitës për llogari të pushtetit.