June 5, 2024
Bota Lajmi i fundit

As nga deti as nga toka, Greqia i “vë kyçin” plazhit të shumëvizituar nga turistët

“Navagio”, i cilësuar si një ndër plazhet më të bukur në Greqi dhe në botë, për sezonin veror të këtij viti nuk do të jetë i aksesueshëm nga pushuesit dhe turistët.

Edhe pse gjiri i vogël në ishullin e famshëm të Zakynthos është shndërruar në një nga destinacionet më të vizituara helene për shkak edhe të anijes së mbytur në 1980,  “Panagiotis”, që gjendet në breg, autoritetet i kanë vendosur “kyçin”.

Plazhi i njohur edhe si “Limani i kontrabandistëve”, ku shihen në pëllëmbë të dorës ishujt e detit Jon, do të qëndrojë i mbyllur me vendim të katër ministrive, përkatësisht asaj për Mbrojtjen e Qytetarëve, ministrisë së Politikave Detare dhe Ishujve, ministrisë së Turizmit dhe Krizave Klimatike, e asaj të Mbrojtjes Civile.

Vendimi është marrë pavarësisht përpjekjeve të autoriteteve vendore dhe garancive për bërjen të aksesueshme të anijes së mbytur, e cila dyshohet se kryente kontrabandë cigaresh dhe alkooli nga ish-Jugosllavia.

Turistëve dhe pushuesve vendas nuk do tu lejohet qarkullimi dhe afrimi, apo ankorimi i varkave dhe as noti i atyre që ndodhen në bord kudo në gji, konkretisht në zonën detare brenda vijës imagjinare, që bashkon dy skajet (verior dhe jugor) të gjirit.

Përsa i përket rrafshnaltës ndalohet hyrja e vizitorëve, me një kufi ndalimi 10 metra nga buza e shpatit ranor.