Sali Berisha nuk ka munguar të mbajë fjalimin e tij të përnatshëm edhe këtë të diel për mbështetësit e tij. Ai është ndalur gjatë te puna e SPAK-ut dhe kreut Altin Dumani, veçanërisht për dosjen e inceneratorëve.
Berisha është shprehur se Dumani është i përfshirë në vjedhje së bashku me kreun e Bashkisë së Tiranës, Erion Veliaj, Ai theksoi se të dy ata marrin urdhra nga kryeministri Edi Rama.
“Të pyesim pak Dumanë dhe Zaman, se në cilën kontratë mbi tokë ekziston neni 3 i kontratës së djegësit të Tiranës i cili në asnjë rrethanë nuk lejon zgjidhjen e kontratës edhe kur zhduken 1130 mln euro.
Qytetarë dhe qytetare. Ju ftoj sonte të shtroni pyetjen me veten tuaj kur Komisioni i Kontrollit të Lartë të Shtetit, gjeti se tarifa 29 euro ishte një vjedhje e tmerrshme e qytetarëve të Tiranës sepse asnjë kilogramë mbetje nuk digjej, por depozitohej dhe duhej të ishte tarifa 11 euro. A mund të na thotë Dumanë dhe Zamanë, janë paratë e tyre apo të shqiptarëve ato që vidhen, apo vjedhin dhe ata me Erion Veliajn. Hajdutë që vjedhin të varfrit e Tiranës.
Ju keni dëgjuar që paratë për djegësin i paguani qytetarët e Tiranës dhe qarkut të Tiranës, por përveç tyre kompania e Erion Veliajt merrte para për çdo ton dhe, inerte, që krijohej në qarkun e Tiranës dhe që me detyrimin e 4 policive nuk mund të shkonin kund tjetër, përveç se në minierën e tij në Sharrë. Qytetarë dhe qytetare. Për çdo ton dhe paguhej 9 euro, për çdo ton zhavorr paguhej 11 euro. Por a e dini ju se ato nuk ekzistojnë asgjëkundi në kontratën me ndërmarrjen e djegësve. Por sa janë ato thoni ju? Gjer tani janë 60 milionë euro. Por për Dumanin dhe Zamanin kjo nuk ka rëndësi sepse ky kriminel e quan hetimin dhe akuzën si pronë të tij, pronë si skllav të Edi Ramës dhe jo shërbëtor i shtetit shqiptar. Duman, ti mendon o i mjerë se ke mburojë. Ti mendon se do të mbrohesh ndaj këtyre krimeve të shëmtuar nga këto apo ato deklarata. Të garantoj se vrimë miu nuk do të gjesh për paratë që u ke grabitë shqiptarëve. Ftoj dumanistë dhe mbështetësit e tij tu japin përgjigje këtyre pyetjeve dhe unë kërkoj publikisht njëherë dhe njëqind herë ndjesë. Por përgjigja e tyre është vetëm një; Dumani vjedh, Dumani vjedh me Erion Veliajn dhe zbaton urdhrat e Edi Ramës”, tha Berisha.
